સુરતના યુવા શિક્ષણવિદ ડો. અર્શન ફરોખ ભાથેનાએ તાજેતરમાં વીર નર્મદ સાઉથ ગુજરાત યુનિવર્સિટીમાંથી મેનેજમેન્ટ વિષયમાં પીએચ.ડી.ની ઉપાધિ મેળવી છે. તેમનો સંશોધન વિષય હતો – સોશિયલ મીડિયા માર્કેટિંગનો યુટ્યુબ પ્રભાવકો મારફતે જનરેશન ઝેડના ખરીદી વલણ પર પડતો પ્રભાવ (સુરત શહેર). આ સંશોધન તેમણે ડો. મનીષ વી. સિધપુરિયાના માર્ગદર્શન હેઠળ પૂર્ણ કર્યું.
ડો. અર્શનનો જન્મ 17 નવેમ્બર, 1994ના રોજ હૈદરાબાદમાં થયો હતો અને તેઓ સુરતમાં ઉછર્યા. તેમના ગર્વિત માતા-પિતા છે આરમીન અને ફરોખ ભાથેના. અર્શને સેન્ટ ઝેવિયર્સ હાઇસ્કૂલ અને શેઠ ધનજીશા રૂસ્તમજી ઉમરીગર સ્મારક શાળામાં અભ્યાસ કર્યો. ત્યારબાદ વીર નર્મદ સાઉથ ગુજરાત યુનિવર્સિટીમાં બી.બી.એ. અને એમ.બી.એ. (માર્કેટિંગ) વિશિષ્ટતા સાથે પૂર્ણ કર્યા. તેમણે ગુજરાત સ્ટેટ એલિજિબિલિટી ટેસ્ટ પાર કરી અને છેલ્લા આઠ વર્ષથી સુરતના ઉચ્ચ શિક્ષણક્ષેત્રે સેવા આપી રહ્યા છે.
હાલ તેઓ ડીઆરબી એન્ડ એન.આઈ.એમ. કોલેજમાં સહાયક પ્રાધ્યાપક છે. સાથે જ તેઓ ડીબીઆઈએમ ખાતે એમ.બી.એ. વિદ્યાર્થીઓને અને આઈ.આઈ.આઈ.ટી.-સુરતમાં એન્જિનિયરિંગના વિદ્યાર્થીઓને પણ ભણાવે છે. અદ્દભુત રીતે, તેઓ આજે એ જ સંસ્થાઓમાં પ્રાધ્યાપક છે જ્યાં એક વખત પોતે વિદ્યાર્થી હતા.
ડો. અર્શન ભાથેનાને તેમની સિદ્ધિ બદલ હાર્દિક અભિનંદન. અમે તેમને ભવિષ્યમાં વધુને વધુ સફળતા માટે શુભકામનાઓ પાઠવીએ છીએ.