30 સપ્ટેમ્બર, 2025ની શુભ અને પાવન સવાર (સરોશ રોજ, અરદીબહેસ્ત મહિનો; યઝ 1395)એ, મુંબઈના પહેલા શહેનશાહી આતશ બેહરામ – શેઠ હોરમસજી બોમનજી વાડિયાજી આતશ બેહરામ – એ પોતાનો ગૌરવપૂર્ણ 196મો સાલગ્રેહ ઉજવ્યો. રંગીન સાલ મુબારક ચોક, સુગંધિત લિલીની તોરણો અને લાલ ગુલાબ-ગલગોટાના ફૂલોથી સજાવટ કરાયેલ આ પવિત્ર સ્થળે ભક્તો મોટી સંખ્યામાં ઉપસ્થિત રહ્યા. ઈન્ડો-ઈરાનિયન સ્થાપત્ય શૈલીના સંમિશ્રણથી બનેલું આ ભવ્ય સ્મારક – ફલ્યુટેડ કોલમ, કોતરાયેલા વરાંડા અને પર્સેપોલિસથી પ્રેરિત બળદના મથાળાં – રાજા ઝર્કસીસના મહેલની ગૌરવશાળી ભવ્યતાને પ્રતિબિંબિત કરે છે.
હાવન ગેહમાં ટ્રસ્ટીઓ દ્વારા પવિત્ર આતશ પાદશાહ સાહેબને સુખડની માચી અર્પણ કરવામાં આવી, ત્યારબાદ હમા અંજુમન જશન યોજાયો જેમાં શહેરભરના 100થી વધુ ભક્તોએ ભાગ લીધો હતો. સવારે યોજાયેલ જશનમાં અનેક વડા દસ્તુરજી ઉપસ્થિત રહ્યા – જેમાં દસ્તુરજી ડો. ફિરોઝ એમ. કોટવાલ, દસ્તુરજી તેહમટન મીરઝાં, ડો. ખરશેદજી દસ્તુર અને ડો. પરવેઝ બજાં વિશેષ નોંધપાત્ર હતા. એર. આદિલ ભેસાનિયાએ (બોઈવાલા) 34 અન્ય ધર્મગુરૂઓ સાથે જશનનું નેતૃત્વ કર્યું.
જશનનો સમારોપ તમામ ઉપસ્થિત ભક્તો દ્વારા ઉત્સાહપૂર્વક કરાયેલી સામૂહિક હમબંદગી સાથે થયો. ટ્રસ્ટીઓ અને મેનેજર ખુરશીદ મિસ્ત્રી દ્વારા વડા દસ્તુરજીને શાલ અને હારથી સન્માનિત કરવામાં આવ્યા. મોબેદોને પણ ભેટો આપવામાં આવી. સાંજના જશનમાં ફરીથી એર. આદિલ ભેસાનિયાએ 11 ધર્મગુરૂઓ સાથે વિધિનું નેતૃત્વ કર્યું. તમામ ભક્તોને ચાસની અને સાથે લઈ જવા માટે મીઠાઈની બોક્સ આપવામાં આવી.
17 નવેમ્બર, 1830ના રોજ સેઠ હોરમસજી બોમનજી વાડિયાજીના પુત્રોએ પોતાના પિતાની અંતિમ ઇચ્છા પૂરી કરવા માટે આ આતશ બેહરામની સ્થાપના કરી હતી, જેનું નેતૃત્વ દસ્તુર એદલજી દારબજી રૂસ્તમજી સંજાણાએ કર્યું હતું. ત્યારથી આ પવિત્ર આતશ બેહરામે અનેક ઇજશ્ની, વંદીદાદ અને નિરંગ દીન વિધિઓના સાક્ષી બન્યા છે, જેના માધ્યમથી પેઢીઓએ આ અનાદિકાળથી ચાલતી આવતી જરથોસ્તી વિધિઓમાં ભાગ લેવાનો અને તેને જાળવી રાખવાનો સન્માન મેળવ્યો છે.
– આઝમીન કાસદ