સુરત પારસી પંચાયત (એસપીપી) અને ઝેડડબ્લ્યુુએએસ (ઝોરાસ્ટ્રિયન વુમન્સ એસોસિએશન ઓફ સુરત) દ્વારા તાજેતરમાં પ્રાર્થનાનું મહત્ત્વ અને સુખના માર્ગ તરફ દોરી જતી શક્તિ વિષય પર વિચારપ્રેરક ધાર્મિક પ્રવચનનું આયોજન એન્ટોનિયા ધર્મશાળામાં કરવામાં આવ્યું હતું. મુંબઈના પ્રસિદ્ધ ઝોરાસ્ટ્રિયન વિદ્વાન ખોજેસ્તે મિસ્ત્રી મુખ્ય વક્તા તરીકે હાજર રહ્યા હતા. તેમણે પ્રાર્થનાની શક્તિ, ધર્મનો સાર અને અંતરંગ સુખની માર્ગયાત્રા વિષે ઊંડી સમજણ આપી.
કાર્યક્રમનું સંચાલન ફરોખ ચિચગર દ્વારા કરવામાં આવ્યું અને અધ્યક્ષસ્થાને દસ્તુરજી એર. સાયરસ એન દસ્તુર હાજર રહ્યા. પ્રસંગે ડો. હોમી દૂધવાલા, પદ્મશ્રી યઝદી કરંજીયા, કેરસી દોરાબજી અને પ્રોફ. એન્જિનિયર જેવા માન્ય અગ્રણીઓ ઉપસ્થિત રહ્યા. કાર્યક્રમની શરૂઆત હમબંદગીથી થઈ હતી, ત્યારબાદ ખોજેસ્તે મિસ્ત્રી દ્વારા ઈરાનના ઇતિહાસ, ઝોરાસ્ટ્રિયન ધર્મના ઉદભવ, પારસી કેલેન્ડર, ગાથા અને મુકતાદના મહત્ત્વ પર રસપ્રદ પ્રવચન આપવામાં આવ્યું.
તેમણે કસ્તી કરવાની યોગ્ય રીત, ઉચ્ચારની શુદ્ધતા અને દૈનિક પ્રાર્થનાથી મળતી આધ્યાત્મિક શક્તિ પર ભાર મૂક્યો. તેમણે દરરોજ પાંચ યથા અને ત્રણ અશેમના પાઠ કરવાનો ઉપદેશ આપ્યો. સાથે જ કહ્યું કે માનવીનું ભાગ્ય તેના વિચારો, શબ્દો અને કર્મો દ્વારા ઘડાય છે – આત્માની યાત્રાનો સાચો અર્થ આનંદમાં જીવવા અને સુખ વહેંચવામાં છે. તેમણે સરોશ યઝદની આત્મ રક્ષા અને મુકતાદ પરંપરા જાળવવાની જરૂરિયાત પર પણ પ્રકાશ પાડ્યો.
આ પ્રવચનના એક દિવસ પહેલા ખોજેસ્તે મિસ્ત્રી દ્વારા સ્ટોરી ઓફ ઈરાન વિષય પર સ્લાઇડ શો રજૂ કરી ઈરાનના સમૃદ્ધ ઈતિહાસ અને સાંસ્કૃતિક વારસાને સુંદર રીતે રજૂ કરવામાં આવ્યા હતા.
પ્રવચન પછી સમુદાય ભોજનનું આયોજન કરવામાં આવ્યું, જે સાથે આ પ્રેરણાદાયી કાર્યક્રમ પૂર્ણ થયો. સુરત પારસી પંચાયતે એવી આશા વ્યક્ત કરી કે જેમનાથી આ કાર્યક્રમ ચૂકી ગયો તેઓ આવનારા કાર્યક્રમોમાં જરૂર જોડાશે.