નવસારી અને પારસી સમુદાય માટે ગૌરવની વાત એ છે કે મહાફ્રીન શાહરૂખ દેસાઈએ વીર નર્મદ દક્ષિણ ગુજરાત યુનિવર્સિટી વીએનએસજીયુના 59મા પદવીદાન સમારોહમાં ત્રણ ગોલ્ડ મેડલ મેળવી પોતાની શૈક્ષણિક પ્રતિભા પુરવાર કરી છે. એસ. બી. ગાર્ડા કોલેજ ટ્રસ્ટ સંચાલિત નવસારીની બી. પી. બારિયા સાયન્સ ઇન્સ્ટિટ્યૂટની વિદ્યાર્થીની મહાફ્રીને ગણિત વિષય સાથે બીએસસીની ડિગ્રી 9.77 સીજીપીએના ઉત્કૃષ્ટ પરિણામ સાથે પૂર્ણ કરી છે. માર્ચ 2026માં યોજાયેલી બીએસસીનેી ડિગ્રી પરીક્ષામાં તેણે સૌથી વધુ સીજીપીએ મેળવ્યું હતું.
તેના અસાધારણ શૈક્ષણિક પ્રદર્શન બદલ તેને સ્વર્ગસ્થ શ્રી કિસનલાલ રણછોડદાસ કાઝી મેમોરિયલ મેડલ, શ્રી પરમહંસ યોગાનંદ મેડલ અને પ્રિન્સિપાલ એન. એમ. શાહ મેડલ એનાયત કરવામાં આવ્યા હતા. યુનિવર્સિટીના પદવીદાન સમારોહમાં ગુજરાતના રાજ્યપાલ આચાર્ય દેવવ્રતે વ્યક્તિગત રીતે ત્રણેય મેડલ એનાયત કરીને તેની શૈક્ષણિક સફરમાં એક યાદગાર સીમાચિહ્ન ઉમેર્યું હતું.
તેની સિદ્ધિ વધુ પ્રભાવશાળી એ વાતને કારણે બને છે કે મહાફ્રીને કોઈ વધારાના ટ્યુશન ક્લાસ લીધા વિના આ સિદ્ધિ મેળવી છે. હવે તે ઉચ્ચ અભ્યાસ અને સંશોધન ક્ષેત્રમાં કારકિર્દી બનાવવાનું આયોજન કરી રહી છે. ગણિતમાં નવી ક્ષિતિજો શોધવાની સાથે સમાજ અને રાષ્ટ્ર માટે અર્થપૂર્ણ યોગદાન આપવાની તેની આશા છે.
નવસારીના તરોટા બજાર વિસ્તારમાં રહેતી મહાફ્રીન પોતાની સફળતાનો શ્રેય માતા-પિતા, શિક્ષકો અને સંસ્થાના માર્ગદર્શન તથા સહકારને આપે છે. યુનિવર્સિટીમાં તેના ઉત્કૃષ્ટ પ્રદર્શનને તેની સંસ્થા તેમજ સ્થાનિક પ્રેસ દ્વારા પણ પ્રશંસા અને માન્યતા મળી છે. મહાફ્રીનની ત્રણ ગોલ્ડ મેડલની આ ભવ્ય સિદ્ધિ તેની મહેનત, દૃઢતા અને શૈક્ષણિક શ્રેષ્ઠતાનું પ્રતિબિંબ છે. તેણે પોતાના પરિવાર અને શિક્ષકોનું ગૌરવ વધાર્યું છે અને પારસી સમુદાયને તેની પ્રતિભાશાળી યુવા પેઢીની ઉજવણી કરવા માટે વધુ એક ગૌરવપૂર્ણ કારણ આપ્યું છે!