મુંબઈના હોરમઝદ મહીયાર પંથકીએ તાજેતરમાં પર્વતારોહણ ક્ષેત્રે એક પ્રભાવશાળી સિદ્ધિ હાંસલ કરી છે. તેમણે માત્ર ત્રણ દિવસના ગાળામાં લદ્દાખનાં બે પડકારજનક શિખરો કાંગ યાત્સે 2 અને ડીઝો જોંગો ઈસ્ટસફળતાપૂર્વક સર કર્યા. બંને શિખરોની ઊંચાઈ આશરે 6,250 મીટર છે.
આ અભિયાનની શરૂઆત 5 સપ્ટેમ્બર, 2026ના રોજ લેહમાં જરૂરી ઊંચાઈને અનુકૂળ થવાની પ્રક્રિયા સાથે થઈ હતી. ત્યારબાદ તેમણે માર્કા વેલીમાંથી ટ્રેકિંગ કર્યું. 5,100 મીટરની ઊંચાઈએ આવેલા કાંગ યાત્સે બેઝ કેમ્પ પર પહોંચ્યા બાદ હોરમઝદે બરફ પર ચાલવાની, ક્રેમ્પોન અને આઈસ-એક્સનો ઉપયોગ કરવાની જરૂરી તાલીમ લીધી અને ત્યારબાદ રાત્રે 930 વાગ્યે શિખર સર કરવાની શરૂઆત કરી.
અંધકાર અને કાતિલ ઠંડી વચ્ચે 7 કિલો વજનનું બેકપેક લઈને ચઢાણ કરતાં હોરમઝદને ભારે થાક અને ઘટી રહેલી ઊર્જાનો સામનો કરવો પડ્યો. તેમને એવું પણ કહેવામાં આવ્યું હતું કે 6,000 મીટરની ઊંચાઈએ આવેલા શોલ્ડર સુધી પહોંચવું પોતાનામાં જ એક મોટી સિદ્ધિ ગણાશે. તેમ છતાં તેમણે આગળ વધવાનો નિર્ણય કર્યો. સવારે 640 વાગ્યે તેઓ અંતે કાંગ યાત્સે ના શિખર પર પહોંચ્યા. સવારના પ્રકાશમાં પર્વતો ઝળહળી ઊઠતાં તે ક્ષણે તેઓ લાગણીથી અભિભૂત થઈ ગયા. પ્રસ્થાનના 13 કલાક બાદ તેઓ સુરક્ષિત રીતે બેઝ કેમ્પ પર પાછા ફર્યા.
ત્રણ દિવસ બાદ હોરમઝદએ ડીઝો જોંગો ઈસ્ટ તરફ પ્રયાણ કર્યું. આ શિખર ટેકનિકલી થોડું સરળ હોવા છતાં 40થી 50 કિમી પ્રતિ કલાકની ઝડપે ફૂંકાતા ભારે પવનને કારણે પર્વતારોહકોને લગભગ ત્રણ કલાક સુધી મુશ્કેલીનો સામનો કરવો પડ્યો. પરિસ્થિતિ વધુ ગંભીર બનતાં ટીમે પાછા ફરવાનો વિચાર પણ કર્યો હતો, પરંતુ બાદમાં હવામાનની સ્થિતિ સુધરી. સવારે આશરે 700 વાગ્યે હોરમઝદ સફળતાપૂર્વક પોતાના બીજા શિખર પર પહોંચી ગયા.
જોકે હોરમઝદ માટે સલામતી હંમેશાં સર્વોચ્ચ પ્રાથમિકતા રહી છે. તેમણે જણાવ્યું હતું કે, જાણીને કોઈ બિનજરૂરી જોખમ લેવું પડે એવું હોય તો કોઈ પણ શિખર તે જોખમ લેવા યોગ્ય નથી. તેમણે માર્ગદર્શકો, હવામાનની પરિસ્થિતિ અને પોતાની શારીરિક મર્યાદાઓનું સન્માન કરવાના મહત્વ પર ભાર મૂક્યો.
પારસી ટાઇમ્સ હોરમઝદને ત્રણ દિવસમાં બે શિખરો સર કરવાની આ અદભુત સિદ્ધિ બદલ હાર્દિક અભિનંદન પાઠવે છે અને ભવિષ્યમાં તેમની આવી અનેક સફળ તથા સલામત સાહસિક યાત્રાઓ માટે શુભેચ્છા પાઠવે છે.